ONNX 101 и Python Dependency Management

По подолга пауза со големо задоволство ви го најавуваме новиот PyData собир. Предавања ќе ни одржат Александар Ивановски, CodeChem, на тема „But it works on my machine?! ONNX 101“ и Томислав Игњатовски, CodeChem, на тема „Python Dependency Management“. Домаќини ќе ни бидат Base42 (https://42.mk), нов хакерспејс во Скопје на Римска 25, близу Млечен. Придружете ни се во четврток, 30.11.2023 од 18:00.

*But it works on my machine?! ONNX 101*

Во динамичниот свет на машинско учење, интероперабилноста меѓу развојни рамки и платформи е од голема важност. Ова е една од најголемите причини за креирањето на иницијативата Open Neural Network Exchange (ONNX) која што им овозможува на дата научниците и девелоперите да ги преместат нивните модели помеѓу различни развојни рамки за deep learning. Во оваа кратка лекција ќе се тргне на патување низ основите на ONNX, ќе се посвети внимание на неговите клучни концепти, придобивки и практични примени.

Александар Ивановски – дипломиран инженер по компјутерски науки кој моментално работи на магистерски студии во International University of Applied Sciences во Германија. Има објавено повеќе научни трудови од областа на машинското учење. Работи во CodeChem, а во текот на својата професионална кариера има работено со огромни светски компании како BASF каде што има голем придонес за изведба на иновативни решенија, користејќи ги податоците за подобрување на процесите во полето на агрикултурата.

*Python Dependency Management*

Денес постојат повеќе package managers кои ги олеснуваат и автоматизираат основите задачи при работа на Python проект. Во оваа презентација ќе се навлезе во деталите што е всушност package manager. Ќе се разгледаат неколку од најпопуларните package managers, нивните предности и нивните недостатоци, а ќе се зборува и за нивната примена и ситуациите во кои секој од нив би се користел. На крајот ќе се прикаже и мало демо каде што ќе може да се види употребата на сите package managers во вистински проект.

Томислав Игњатов е софтверски инженер во CodeChem со искуство во развој на NLP модели и има работено на различни проекти од полето на медицината – од развој на модели за класификација на срцев ритам, до претставување и класификација на ДНК, како и анализа за предиспозициите за развој на одредени болести. Томислав е голем open source ентузијаст, најмногу активен во развивање и имплементирање на модели за машинско учење, заедно со подготовка на податоци преку развој на ETL pipelines.